Paulo Martina director nobo di Comite di Conmemoracion Pasado di Sclavitud

E directiva di e Fundacion Comite di Conmemoracion Pasado di Sclavitud ta anuncia cu entrante 1 di mei 2026, sr. Paulo Martina lo asumi e funcion di director di e organisacion.

Astrid Elburg, presidente di e Comite di Conmemoracion Pasado di Sclavitud: “Paulo Martina ta un persona cu, mescos cu e otronan den nos team, ta un experto y sumamente competente. Banda di esey, e ta dirigi riba solucion y ta comparti nos vision di tanto e realidad actual como e futuro.”

Paulo Martina a nace na Corsou na 1964 y a muda pa Hulanda ora e tabatin 12 aña. Ya pa 30 aña e ta traha den sector di arte y cultura y for di 2023 e ta director di e Musea Zutphen. Tambe e ta presentado di e programa di televicion Nu te Zien!

Prome cu esey Martina tabata director di Museo van Bommel van Dam na Venlo pa 4 aña y pa 10 aña e tabata director di Museo Dr8888 na Drachten. Tambe e tin experencia amplio den funcionnan di conseho y maneho den e sector cultural, entre otro como consehero di e fundacion Boekman y como miembro di e comision di conseho Kunstraad Groningen.  

Paulo Martina: “Pa motibo di mi propio origen, mi ta sinti un conexion intrinsico cu e historia di sclavitud. Esaki ta haci mi extra motiva pa uza mi conocemento y experencia pa e Comite di Conmemoracion Pasado di Sclavitud. Pa motibo di mi raiznan, mi ta profundamente conecta cu e hendenan y e topico.”

Martina su credo ta cu tur hende tin derecho di conoce nan mes historia. Un historia cu cua bo por identifica, cu ta yuda bo compronde bo mes, otronan y bo alrededor miho. Conscientisacion ta clave den esaki. 

“E historia di sclavitud ta parti di nos historia comparti. Dor di conscientisacion tocante di e pasado compartí aki, bo ta traha pa sanacion den presente y bo ta haci un futuro comparti posibel. Door di stimula investigacion, educacion y dialogo tocante e historia di sclavitud, bo ta aumenta e conscientisacion di sociedad tocante di su impacto. Scucha cuidadosamente ta un rekisito pa por colabora cu comunidadnan afecta y organisacionnan social denter di Reino Hulandes y Surnam. Mi ta ansioso pa traha cu tur e comitenan local, Ninsee, e Museo Nacional di Sclavitud, i gobierno nacional. Manera Astrid Elburg, presidente di e comision, ta bisa: “Schouder na schouder, nos ta trahando pa un futuro resiliente.”