Conmemoracion y Historia

  • Dialogo y proceso

    Conmemora ta mas cu solamente wak patras na historia, e ta nifica tambe bay den dialogo den e momento aki y awor. Dialogo ta un medio poderoso pa e Comite di Conmemoracion pa reconoce e pasado di Sclavitud, pone su efecto riba mesa pa discucion y contribui na recuperacion.

  • Dialogo ta e brug caminda pasado y futuro ta topa otro den confiansa.

    Nos ta kere cu procesamentu social ta cuminsa cu scucha. Scucha e historia di desendientenan y scucha e diferencianan den e experencianan y perspectivanan. Nos ta tene e dialogonan aki conscientemente: entre regionan, entre comunidadnan, entre generacionnan den henter Reino.

  • Ora bosnan topa otro, silencio por transforma den sanacion y conexion.

    Pa medio di programanan educativo, encuentronan di dialogo y ritualnan di conmemoracion nos ta stimula un cultura cu no ta trece spanto caminda tin algo cu no confortabel, pero caminda tin espacio pa sanacion, conscientisacion y husticia. Procesamentu asina no ta un punto final, pero un proceso colectivo caminda tur hende por tin un bos.

  • Smiling man, possibly a participant or speaker at an HC-SLV event, embodying the spirit of dialogue and connection.
  • Diverse group of people engaging at an HC-SLV cultural or educational exhibition, fostering intergenerational dialogue on slavery history.
  • Diverse audience seated in a hall, participating in an HC-SLV community dialogue or commemoration event focused on shared history and understanding.
  • Individuals listening attentively at an HC-SLV educational event, engaging with discussions on the history and legacy of slavery in the Dutch Kingdom.

E pasado di sclavitud:
un historia cortico

E pasado di Sclavitud Hulandes a cuminsa na comienso di siglo 17, ora compania di comercio manera West-Indische Compagnie (WIC) y Verenigde Oost-Indische Compagnie (VOC) a haci hende catibo y uza nan den un economia global di explotacion.

  • Conmemora hunto, bay dilanti hunto

    Na nomber di comercio y rikesa, cien di miles di hende for di Oost Africa y Asia a ser secuestra, bende y converti den propiedad. A transporta nan contra nan boluntad pa colonia, entre otro pa Surinam, Aruba, Corsou, Boneiro, Sint Eustatius, Saba, Sint Maarten, Indonesia, Sri Lanka y Zuid Africa.

    Riba e plantashinan, den casnan, hafnan y minanan, nan tabata obliga pa traha bou di precion fuerte y hopi biaha bou di condicionnan violento. Estado Hulandes a legitima e sistema aki di forma huridico y economico, y a saca probecho grandi di dje. Sclavitud no tabata excepcion, pero un fundeshi di e sistema colonial. Tambe pueblonan indigena, por ehempel na continente di Zuid America y den area di Caribe, a ser horta di nan tera, oprecioná y a trata algun tambe como esclabo. Nan historia y lucha ta un parti esencial, pero hopi biaha lubida, di e pasado aki.

  • Na mes momento, continuamente tabatin resistencia. Hende sclavisa a rebeldia, scapa of a funda comunidadnan liber, manera e Maroonnan na Surinam. Na Corsou, Tula a dirigi un rebelion na gran escala contra e sistema di Sclavitud na 1795.

    Tambe na otro islanan tabatin resistencia hunto cu figuranan fuerte manera One Tété Lohkay na Sint Maarten, cu a sigui core maske e tabatin herida fisico grave y a stimula otro hende pa resisti, y Sablika na Sint Eustatius, cu segun tradicion, a prefera duna su bida cu su libertad. Den diferente parti di Reino, hendenan indigena y esnan sclavisa a mantene nan idiomanan, ritualnan y tradicionnan cultural bibo. Como un acto di forsa, sobrevivencia y conservacion propio.

    Riba 1 juli 1863, Hulanda a aboli Sclavitud oficialmente. Pero numa na 1873, despues di dies aña di supervicion estatal obligatorio, trabou forsa a yega na un fin pa hopi hende na Surinam. Ey a cuminsa un fase nobo di explotacion, cu yegada di trahadonan contractual for di India y Java. E trahadonan contractual aki tabata traha bou di mesun condicionnan di dependencia y control manera durante e periodo di Sclavitud. Tambe na Corsou, hende tabata forsa pa traha pa un cen chikito den e sistema di paga-terra riba tereno di ex doñonan di plantashi. E tabata un forma di desigualdad colonial cu a continua, cu no a ofrece libertad real.

  • Te e dia di awe, ta sinti e consecuencianan di e pasado aki den sociedad Hulandes. Hopi biaha sin cu ta nota esaki, pensamentonan y structuranan di poder racista for di e era colonial ta sigui biba den institutonan y relacionnan. Desigualdad tin influencia den educacion, caminda studiantenan di color ta haya conseho structuralmente mas abou, den mercado di vivienda y esun laboral, den representacion cultural, den institutonan di herencia cultural y den uso di idioma.

  • Un pasado cu ta papia,
    un futuro cu ta scucha

    Pero e pasado no ta sigui biba solamente den dolor y trauma. E historia aki ta carga tambe storianan di orguyo, lucha y resiliencia. E forsa di e antepasadonan, cu a sobrevivi, a resisti y a forma comunidadnan, ta inspira te dia di awe. Heroe di resistencia manera Anton de Kom, cu den siglo binti a denuncia colonialismo y racismo na Surinam y Hulanda, ta mustra cu e lucha aki ta bay mas aya di generacion pa generacion.

    E Comite di Conmemoracion di Pasado di Sclavitud ta traha pa un reconocemento permanente di e pasado aki. Nos ta crea espacio pa educacion, conmemoracion, recuperacion y conscientisacion, den cada region di Reino.

Añanan y momentonan importante

Africa prome cu sclavitud

Hopi tempo prome cu yegada di Europeonan, nacionnan West Africano ya tabatin culturanan y reinonan rico manera Songhai, Mali, Benin y Congo. Cu monarcanan y sistemanan politico complica. Tambe na nivel di pueblo tabata existi structuranan di gobernacion mas chikito. Arte, ciencia y tecnologia tabata florece. Africanonan tabata bon den medicina, matematica y astronomia y nan tabata produci articulonan luhoso di brons, ivoor, oro y teracota. Comercio cu Europeonan via Noord Africa a cuminsa for di trempan. Den siglo 15 e Portuguesnan a aparece na costa, sigui pa otro poderosonan Europeo. Nan tabata haci negoshi di oro, ivoor y specerij, pero tambe a cuminsa bende y secuestra Africanonan. Den siglo 17 sclavitud a bira e nucleo di e comercio transatlantico, debi na e aumento di interes den sucu.

Comercio di sclavitud transatlantico

Entre 1525 y 1867 Europeanonan a transporta miyones di Africano como parti di e comercio di catibo transatlantico. E Hulandesnan, via e West Indische Compagnie, a transporta mas cu 600.000 Africano. Corsou y Sint Eustatius a sirbi como punto di transito pa otro colonia, pero tambe como luga di sclavitud, cu plantashi.
E biahe tabata mortal: uno (1) riba shete (7) persona sclavisa no tabata sobrevivi. Na Surinam, miles di persona sclavisa tabata traha riba plantashi di sucu. Hopi a bay y a forma comunidadnan Marron cu tabata resisti sclavitud.
E poblacion indigena a sufri hopi, pero toch nan cultura a keda existi door di creolisacion, den cual influencia Africano, Europeo, Asiatico y indigena a bini hunto. Te ainda rastronan di esaki ta visibel.

Thico on Aruba

Na 1795 Thico, un persona sclavisa cu tabata propiedad di estado, publicamente a protesta contra sclavitud na Aruba. E a nenga di sigui sirbi y a exigi su libertad. Thico a keda deteni y manda pa Corsou. Pasobra e a keda resisti, nan a fors’e pa traha na Fort Amsterdam. Su protesta balente, mesora prome cu e lantamento di Tula na Corsou, ta haci di Thico un di e prome luchadonan pa libertad di Aruba.

Martis di Katalina Janga na Boneiro

Na 1834, Martis di Katalina Janga a guia un lantamento na Boneiro contra e circunstancianan laboral cruel na e saliña di salo. Personanan sclavisa diariamente mester a cana pa oranan largo den calor extremo y bou di supervicion di opzichter violento. Bou di guia di Martis nan a exigi trato igual. E lantamento a dura mas o menos un siman y a marca un momento importante di resistencia den historia di Boneiro. Ainda ta corda su accionnan como un simbolo di lucha contra inhusticia.

Tula na Corsou

Riba 17 di augustus 1795 Tula a guia e lucha pa libertad di mas grandi di personanan sclavisa na Corsou. E tabata traha riba plantashi Kenepa y hunto cu diferente otro personanan sclavisa tabata exigi libertad di nan doño. E Hulandesnan a captura Tula y a mat’e di forma cruel. Na 2010 Corsou a reconoce Tula como heroe nacional y na 2023 Hulanda a rehabilita Tula. Tur aña riba 17 di augustus, ta conmemora e lucha aki durante Dia di Lucha pa Libertad.

Boni, Baron y Joli-Coeur na Surinam

Boni, naci cerca e Marrons na Surinam, a bira e lider y e grupo di guerrilla cu tabata ataca plantashi y libera personanan sclavisa na Fort Boekoe. Na 1772 e grupo a libera 70 persona di e plantashi di Poelwijk. Hunto cu su compañeronan Baron y Joli-Coeur pa hopi aña a lucha contra poder colonial. Danki na nan accionnan nan a bira luchadonan pa libertad legendario den historia di Surinam.

One-Tété Lohkay na Sint Maarten

One-Tété Lohaky tabata un hende muhe sclavisa na Sint Maarten cu a purba scapa varios biaha. Como castigo a kita un di su pechonan y asina e a haña e nomber One-Tété. A pesar di e castigo hororoso aki, e a keda lucha y e a bira simbolo di libertad. Riba Dia di Emancipacion ta honra su curashi y determinacion na Sint Maarten, caminda nan ta celebra One-Tété como heroe di resistencia contra sclavitud.

Personanan sclavisa ta scapa Saba

Na 1654, 14 persona sclavisa a horta un barco y a scapa pa Puerto Rico, sperando di por biba den libertad. Lastimamente nan a bolbe cay den sclavitud. Siglonan despues, rond 1860, doñanan di catibo a bende hopi persona sclavisa na Saba cu plantashi Mericano. Hopi persona sclavisa a hui pa evita e destino aki. E historianan aki ta demostra e resistencia continuo contra sclavitud, te riba isla chikito manera Saba.

Rebelion di personanan sclavisa na Statia

Riba 12 di juni 1848 personanan sclavisa na Sint Eustatius a exigi libertad, miho stock di cuminda y periodo pa descansa. E gobernador local a nenga y despues e protesta a escala. Militia a ataca: varios rebelde a keda herida of hasta mata. Seis persona, entre nan Thomas Dupersoy, a keda deporta. Despues di e lantamento doñonan di plantashi a cuminsa ofrece sueldo pa evita mas intrankilidad. E lantamento tabata un resistencia fuerte contra oprecion colonial na e isla chikito.

Emancipacion

Na 1863 a aboli sclavitud na Surinam y parti Caribense di Reino. Cu esaki e proceso di emancipacion a cuminsa. Na 1954 Hulanda, Antia Hulandes y Surinam a firma e Statuut pa Reino Hulandes. Cu esaki a establece e relacion den Reino. Efraïn Jonckheer a firma Statuut y Surinam a bira pais autonomo den Reino. Na 1975 Surinam a bira independiente, na 1986 Aruba a haña status aparte y na 2010 a desmantela Antia Hulandes: Corsou y Sint Maarten a bira pais autonomo, mientras Boneiro, Saba y Sint Eustatius a bira municipio special di Hulanda.

Disculpa di Hulanda pa pasado di sclavitud

Riba 19 di december 2022 minister president di Hulanda Mark Rutte a pidi disculpa oficial pa e rol cu estado Hulandes a hunga den sclavitud. Funcionarionan Hulandes tambe tabata presente na tur e seis islanan y na Surinam y pa pidi disculpa. E a bisa cu sclavitud ta un crimen contra humanidad cu a ocasiona hopi sufrimento y cu ainda tin influencia riba bida di hende. Pa siglonan, e estado Hulandes a permiti, mantene y probecha di sclavitud. Bou di gobernacion Hulandes, hende tabata wordo trata manera mercancia y maltrata. Gobiernonan sucesor for di 1863 no a logra reconoce completamente e impacto duradero di e historia aki.