Konmemorashon i Historia

  • Diálogo i proseso

    Konmemorá ta mas ku solamente wak patras na historia, e ta nifiká tambe bai den diálogo den e momentu aki i awor. Diálogo ta un medio poderoso pa e Komité di Konmemorashon pa rekonosé e pasado di sklabitut, pone su efekto na mesa pa diskushon i kontribuí na rekuperashon.

  • Diálogo ta e brug kaminda pasado i futuro ta topa otro den konfiansa.

    Nos ta kere ku prosesamentu sosial ta kuminsá ku skucha. Skucha storia di desendiente i skucha diferensia den eksperensia i perspektiva. Nos ta tene e diálogonan aki konsientemente: entre region-, entre komunidat-, entre generashonnan den henter Reino.

  • Ora bosnan topa otro, silensio por transformá den sanashon i konekshon.

    Pa medio di programa edukativo, enkuentro di diálogo i ritual di konmemorashon nos ta stimulá un kultura ku no ta trese spantu kaminda tin algu no konfortabel, pero kaminda tin espasio pa sanashon, konsientisashon i hustisia. Prosesamentu asina no ta un punto final, pero un proseso kolektivo kaminda tur hende por tin un bos.

  • Smiling man, possibly a participant or speaker at an HC-SLV event, embodying the spirit of dialogue and connection.
  • Diverse group of people engaging at an HC-SLV cultural or educational exhibition, fostering intergenerational dialogue on slavery history.
  • Diverse audience seated in a hall, participating in an HC-SLV community dialogue or commemoration event focused on shared history and understanding.
  • Individuals listening attentively at an HC-SLV educational event or lecture, engaging with discussions on the history and legacy of slavery in the Dutch Kingdom.

E pasado di sklabitut: un historia kòrtiku


E pasado di sklabitut hulandes a kuminsá na komienso di siglo 17, ora kompania di komersio manera West-Indische Compagnie (WIC) i Verenigde Oost-Indische Compagnie (VOC) a hasi hende katibu i usa nan den un ekonomia global di eksplotashon.

  • Konmemorá huntu, bai dilanti huntu

    Na nòmber di komèrsio i rikesa, shen di míles di hende for di Afrika Ost i Asia a ser sekuestrá, bendé i konvertí den propiedat. A transportá nan kontra nan boluntat pa kolonia, entre otro pa Sürnam, Aruba, Kòrsou, Boneiru, Sint Eustatius, Saba, Sint Maarten, Indonesia, Sri Lanka i Afrika Sur.

    Riba e plantashinan, den kas, haf i mina, nan tabata obligá pa traha bou di preshon fuerte i hopi biaha bou di kondishonnan violento. Estado hulandes a legitimá e sistema aki di forma hurídiko i ekonómiko, i a saka probecho grandi di dje. Sklabitut no tabata eksepshon, pero un fundeshi di e sistema kolonial. Tambe pueblonan Indígeno, por ehèmpel na kontinente di Suramérika i den área di Karibe, a ser hòrtá di nan tera, opreshoná i a trata algun tambe komo esklabo. Nan historia i lucha ta un parti esensial, pero hopi biaha lubidá, di e pasado aki.

  • Na mes momentu, kontinuamente tabatin resistensia. Hende sklabisá a rebeldiá, hui òf a funda komunidatnan liber, manera e Maroonnan na Sürnam. Na Kòrsou, Tula a dirigí un rebelion na gran eskala kontra e sistema di sklabitut na 1795.

    Tambe na otro islanan tabatin resistensia huntu ku figura fuerte manera One Tété Lohkay na Sint Maarten, ku a sigui kore apesar di herida físiko grave i a stimulá otro hende pa resistí, i Sablika na Sint Eustatius, ku segun tradishon, a preferá duna su bida ku su libertat. Den diferente parti di Reino, hende Indígeno i esnan sklabisá a mantené nan idioma, ritual- i tradishonnan kultural bibu. Komo un akto di forsa, sobrebibensia i konservashon propio.

    Na 1 di yüli 1863, Hulanda a abolí sklabitut ofisialmente. Pero numa na 1873, despues di dies aña di supervishon estatal obligatorio, trabou fòrsá a yega na un fin pa hopi hende na Sürnam. Ei a kuminsá un fase nobo di eksplotashon, ku yegada di trahadó kontraktual for di India i Java. E trahadónan kontraktual aki tabata traha bou di mesun kondishon di dependensia i kontròl manera durante e periodo di sklabitut. Tambe na Kòrsou, hende tabata fòrsa pa traha pa un sèn chikí den e sistema di paga-terra riba tereno di eks doñonan di plantashi. E tabata un forma di desigualdat kolonial ku a kontinuá, ku no a ofresé libertat real.

  • Te e dia di awe, ta sinti e konsekuensianan di e pasado aki den sosiedat hulandes. Hopi biaha sin ku ta nota esaki, pensamentu- i strukturanan di poder rasista for di e era kolonial ta sigui biba den instituto- i relashonnan. Desigualdat tin influensia den edukashon, kaminda studiante di koló ta haña konseho strukturalmente mas abou, den merkado di bibienda i esun laboral, den representashon kultural, den instituto di herensia kultural i den uzo di idioma.

  • Un pasado ku ta papia,
    Un futuro ku ta skucha

    Pero e pasado no ta sigui biba solamente den doló i trouma. E historia aki ta karga tambe storianan di orguyo, lucha i resiliensia. E forsa di e antepasadonan, ku a sobrebibí, a resistí i a forma komunidat, ta inspirá te dia di awe. Héroe di resistensia manera Anton de Kom, ku den siglo binti a denunsiá kolonialismo i rasismo na Sürnam i Hulanda, ta mustra ku e lucha aki ta bai mas ayá di generashon pa generashon.

    E Komité di Konmemorashon di Pasado di Sklabitut ta traha pa un rekonosementu permanente di e pasado aki. Nos ta krea espasio pa edukashon, konmemorashon, rekuperashon i konsientisashon, den kada region di Reino.

Aña i momentunan importante

Afrika promé ku sklabitut

Hopi tempu promé ku yegada di Oropeonan, nashonnan Wèst Afrikano ya tabatin kulturanan i reinonan riku manera Songhai, Mali, Benin i Congo. Ku monarkanan i sistemanan polítiko kompliká. Tambe na nivel di pueblo tabata eksistí strukturanan di gobernashon mas chikí. Arte, siensia i teknologia tabata floresé. Afrikanonan tabata vèrsá den medisina, matemátika i astronomia i nan tabata produsí artíkulonan luhoso di bròns, ivor, oro i terakota. Komèrsio ku Oropeonan via Nort Afrika a kuminsá fo’i trempan. Den siglo 15 e Portuguesnan a aparesé na kosta, siguí pa otro poderosonan Oropeo. Nan tabata hasi negoshi di oro, ivor i speserei, pero tambe a kuminsá bende i sekuestrá Afrikanonan. Den siglo 17 sklabitut a bira e núkleo di e komèrsio transatlántiko, debí na e oumento di interes den suku.

Komèrsio di sklabitut transatlántiko

Entre 1525 i 1867 Europeanonan a transportá miónes di Afrikano komo parti di e komèrsio di katibu transatlántiko. E Hulandesnan, via e West Indische Compagnie, a transportá mas ku 600.000 Afrikano. Kòrsou i Sint Eustatius a sirbi komo punto di tránsito pa otro kolonia, pero tambe komo lugá di sklabitut, ku plantashi. 
E biahe tabata mortal: un riba 7 persona sklabisá no tabata sobrebibí. Na Sürnam, míles di persona sklabisá tabata traha riba plantashi di suku. Hopi a hui i a forma komunidatnan Marron ku tabata resistí sklabitut.
E poblashon indígena a sufri hopi, pero tòg nan kulturanan na keda eksistí dor di kreolisashon, den kua influensianan afrikano, europeo, asiátiko i indígena a bini huntu. Te ainda rastronan di esaki ta visibel.

Thico na Aruba

Na 1795 Thico, un persona sklabisá ku tabata propiedat di estado, públikamente a protestá kontra sklabitut na Aruba. E la nenga di sigui sirbi i a eksigí su libertat. Thico a keda arestá i mandá pa Kòrsou. Pasombra e la keda resistí, nan a fòrs’e pa traha na Fort Amsterdam. Su protesta balente, djis promé ku e lantamentu di Tula na Kòrsou, ta hasi di Thico un di e promé luchadónan pa libertat di Aruba.

Martis di Katalina Janga na Boneiru

Na 1834 Martis di Katalina Janga a guia un lantamentu na Boneiru kontra e sirkunstansianan laboral kruel na e saliñanan di salu. Personanan sklabisá diariamente mester a kana pa oranan largu den kalor ekstremo i bou di supervishon di opzichter violento. Bou di guia di Martis nan a eksigí trato igual. E lantamentu a dura mas o ménos un siman i a marka un momento importante di resistensia den historia di Boneiru. Ainda ta kòrda su akshonnan komo un símbolo di lucha kontra inhustisia.

Tula na Kòrsou

Riba 17 di ougùstùs 1795 Tula a guia e lucha pa libertat di mas grandi di personanan sklabisá na Kòrsou. E tabata traha riba plantashi Kenepa i huntu ku diferente otro persona sklabisá tabata eksigí libertat di nan doño. E hulandesnan a kapturá Tula i a mat’é di forma kruel. Na 2010 Kòrsou a rekonosé Tula komo héroe nashonal i na 2023 Hulanda e rehabilitá Tula. Tur aña riba 17 di ougùstùs, ta konmemorá e lucha aki durante Dia di Lucha pa Libertat.

Boni, Baron i Joli-Coeur na Sürnam

Boni, nasé serka e Marrons na Sürnam, a bira e lider i e grupo di gueria ku tabata ataká plantashi i liberá personanan sklabisá na Fort Boekoe. Na 1772 e grupo a liberá 70 persona di e plantashi di Poelwijk. Huntu ku su kompañeronan Baron i Joli-Coeur pa hopi aña e la lucha kontra poder kolonial. Danki na nan akshonnan nan a bira luchadónan pa libertat legendario den historia di Sürnam.

One-Tété Lohkay na Sint Maarten

One-Tété Lohaky tabata un hende muhé sklabisá na Sint Maarten ku a purba skapa vários biaha. Komo kastigu a kita un di su pechunan i asina e la haña e nòmber One-Tété. Apesar di e kastigu hororoso aki, e la keda lucha i e la bira símbolo di libertat. Riba Dia di Emansipashon ta honra su kurashi i determinashon na Sint Maarten, kaminda nan ta selebrá One-Tété komo héroe di resistensia kontra sklabitut.

Personanan sklabisá ta skapa Saba

Na 1654 14 persona sklabisá a hòrta un barku i a hui pa Puerto Rico, sperando di por biba den libertat. Lástimamente nan a bolbe kai den sklabitut. Siglonan despues, alrededor di 1860, doñonan di katibu a bende hopi persona sklabisá na Saba ku plantashi Merikano. Hopi persona sklabisá a hui pa evitá e destino aki. E historianan aki ta demonstrá e resistensia kontinuo kontra sklabitut, asta riba isla chikitu manera Saba.

Rebelion di personanan sklabisá na Statia

Riba 12 di yüni 1848 personanan sklabisá na Sint Eustatius a eksigí libertat, mihó stòk di kuminda i periodo pa deskansá. E gobernadó lokal a nenga i despues e protesta a eskalá. Milishon a ataká: vários rebelde a keda heridá òf asta matá. Seis persona, entre nan Thomas Dupersoy, a keda deportá. Despues di e lantamentu doñonan di plantashi a kuminsá ofresé suèldu pa evitá mas intrankilidat. E lantamentu tabata un resistensia fuerte kontra opreshon kolonial na e isla chikí.

Emansipashon

Na 1863 a abolí sklabitut na Sürnam i parti Karibense di Reino. Ku esaki e proseso di emansipashon a kuminsá. Na 1954 Hulanda, Antia Hulandes i Sürnam a firma e Statuut pa Reino Hulandes. Ku esaki a establesé e relashon den Reino. Efraïn Jonckheer a firma Statuut i Sürnam a bira pais outónomo den Reino. Na 1975 Sürnam a bira independiente, na 1986 Aruba a haña status aparte i na 2010 a desmantelá Antia Hulandes: Kòrsou i Sint Maarten a bira pais outónomo, miéntras Boneiru, Saba i Sint Eustatius a bira munisipio spesial di Hulanda. 

Diskulpa di Hulanda pa pasado di sklabitut

Riba 19 di desèmber 2022 promé minister di Hulanda Mark Rutte a pidi diskulpa ofisial pa e ròl ku estado hulandes a hunga den sklabitut. Funshonarionan hulandes tambe tabata presente na tur seis isla i na Sürnam i pa pidi diskulpa. E la bisa ku sklabitut ta un krímen kontra humanidat ku a okashoná hopi sufrimentu i ku ainda tin influensia riba bida di hende. Pa siglonan, e estado hulandes a permití, mantené i probechá di sklabitut. Bou di gobernashon hulandes, hende tabata wòrdu tratá manera merkansia i maltratá. Gobièrnunan susesivo for di 1863 no a logra rekonosé kompletamente e impakto duradero di e historia aki.