Di dos fase di mural ‘Tula den kada un di nos’ ta mustra 13 héroe lokal

KOMUNIKADO DI PRENSA

22 di desèmber 2025

Di dos fase di mural ‘Tula den kada un di nos’ ta mustra 13 héroe lokal

WILLEMSTAD – Riba djadumingu, 21 di desèmber Komité di Konmemorashon Pasado di Sklabitut a desvelá e di dos fase di e mural ‘Tula den kada un di nos’, un obra di arte poderoso di artista Garrick Marchena di Kòrsou. Miéntras e promé fase a deskribí Tula di forma grandioso, bistí na blanku, sintá orguyoso riba un kabai, komo un símbolo di resistensia, dignidat i forsa ku no por kibra, e di dos fase aki ta enfoká riba diestres otro héroe di Kòrsou ku, kada un na nan mes manera, a duna kontribushon duradero na desaroyo i emansipashon di e komunidat Kurasoleño.

E hendenan hòmber i muhé aki no ta wòrdu presentá komo figuranan isolá di pasado, pero komo kargadó di e mesun espíritu ku a enkarná Tula. Kada un di nan a karga Tula den nan seno: den palabra i echo, den kultura i liderazgo, den lucha i kuido. Tula den kada un di nos no ta un punto final, sino un invitashon – no solamente pa konmemorá Tula, pero pa rekonos’é den nos mes i den otro.

E diestres héroenan di Kòrsou honrá den e di dos fase aki ta:

• Manuel Carlos Piar – lider militar i luchadó pa libertat;
• Philippus (Pedro) Ludovicus (Louis) Brion – héroe riba laman i estratega di e lucha regional pa independensia;
• Felix Chacutu – figura di resistensia i luchadó di derechonan afro-kurasoleño;
• Medardo de Marchena – pensadó i aktivista radikal kontra strukturanan di poder kolonial;
• Dr. Moises Frumencio da Costa Gomez – estadista i arkitekto di emansipashon polítiko;
• Angela Altagracia (Tata) de Lannoy-Willems – lider di komunidat i modelo den kuido i edukashon;
• Carmen Cecilia Nieuw-Zielinski – sosialmente embolbí i kargadó di kultura;
• Pedro Tirso Maria Sprockel – tabata un defensor di Papiamentu den enseñansa. E tabata tambe pionero den trabou sosial pa hubentut: el a yuda funda Federatie Antilliaanse Jeugdzorg (FAJ) na aña 1953;
• Pierre Lauffer – poeta ku a elevá Papiamentu na un idioma ku ta duna un sentimentu di orguyo;
• Elis Juliana – eskritor i folklorista ku a establesé kultura Afro-kurasoleño;
• Amador Nita – defensor di hustisia sosial;
• Wilson (Papa) Godett – lider sindikal i símbolo di resistensia kolektivo;
• Adele Rigaud – dosente i pionero den emansipashon edukashonal.

“E diestres héroenan aki a yuda forma Kòrsou. Nan pensamentu, nan lucha, nan kuido i nan kreatividat ta forma e fundeshi di ken nos ta komo komunidat awe. Dor di hasi nan visibel banda di Tula, nos ta rekonosé ku emansipashon no tabata un momentu den tempu, pero un proseso – kargá pa hopi, atraves di generashonnan. Esaki ta tambe un invitashon: pa mantené nan kurashi bibu den kon nos ta biba huntu awe”, asina Lucia Beck, direktor di e parti Karibense di Reino pa e Komité di Konmemorashon Pasado di Sklabitut, ta duna di konosé.

Ku e di dos fase aki, Tula den kada un di nos ta posishoná su mes komo un monumento bibu – visibel riba kaya, tangibel den kombersashonnan i resonando di generashon pa generashon.

E desvelo tabata parti di e Selebrashon di Fin di aña di e Komité di Konmemorashon di Pasado di Sklabitut i e movementu #Kurashi #Courage mas amplio. E mural ‘Tula den kada un di nos’ tabata unu di na total tres stòp di e Kurashi Walking Tour dor di Otrobanda. E Walking Tour aki a trese huntu arte, historia, tradishon oral i músika den e espasio públiko.

Un otro stòp tabata e kas kaminda Nilda Pinto a nanse, un dosente i figura prominente di komunidat di Kòrsou, ku a forma generashonnan di mucha i tabata komprometé na traspaso di konosementu i konsientisashon kultural. Na e stòp aki, un artista a duna Nilda Pinto bida i a konta un kuenta di Kompa Nanzi, suprayando e importansia di tradishon oral i kuentanan di pueblo.

E di tres stòp tabata na e mural di Kemuël Sandries bou di viadukto, kaminda a pone atenshon na e orígen i nifikashon di Tambú komo un forma di resistensia, ekspreshon i sanashon kolektivo. Un bailarin a konta e historia di Tambú i a dun’é bida den baile, kompañá pa un grupo di músiko tokando tambú tradishonal i otro instrumentonan outéntiko, inkluyendo e kachu i chapi.

Despues di e walking tour, públiko a reuní na Rif Fort pa un selebrashon di fin di aña tradishonal, habrí pa henter Kòrsou. Durante e selebrashon aki tabata toka músika bibu di aguinaldo, gaita i tambú pa asina klousurá e aña huntu – ankrá den tradishon, kargá dor di komunidat i enfoká riba futuro.

Tokante di Komité di Konmemorashon Pasado di Sklabitut

Riba 6 di yanüari 2025 a funda e Komité di Konmemorashon Pasado di Sklabitut. E Komité ta aktivo den hinter reino ku ofisina na Hulanda, Kòrsou (Otrobanda) i Sint Eustatius (Oranjestad). For di e ofisinanan aki e Komité ta traha riba konmemorashon, konsientisashon i rekonosementu di e pasado di sklabitut i su impakto.

Nota pa redakshon: Pa mas informashon, por fabor tuma kontakto ku Konsehero di Komunikashon Kim Sambo na +5999 5237860 òf via kim.sambo@hc-slv.org